文：挪罐難
圖：歐陽靜怡
呢兩三年嘅暑假，電視間唔時都會播下屈臣氏嘅蒸餾水廣告。故事內容約莫講四個細路去遠足，其中一個男仔口渴飲溪水，就俾同行少女阻止……其實個故仔唔淨止得咁短，不過心水清嘅電視迷、廣告迷應該都會記得，少女訓斥男仔嗰句：“你有冇常識噶？飲冇煲過嘅溪水！”（雖則呢句金句今年唔再出現響呢個廣告入面。）
查實呢個廣告真係好鬼死有話題性，如果唔係篇幅所限，鄙人想討論嘅疑問幾乎仲要長過你祖師奶奶條紮腳布！飲冇煲過嘅溪水係咪“冇常識”？條靚妹手上支水同溪水一樣“都係冇煲過”？食水係咪事必要“用105°C高温蒸餾”先至飲得落口？好可惜，以上嘅問題，都唔會講住；事關淨係“溪水”嘅兩個字都有排講！
響嗰個靚妹嘅演繹之下，“溪水”居然令諸位看倌聯想起不堪入耳嘅粗口——“閪水”！君不見短片分享網站《You Tube》充斥住相關惡搞短片，仲要配粗口字幕？
乜“溪”同“閪”呢兩個字嘅讀音，真係似得咁交關咩？
話時話，“溪”同“閪”呢兩嘅粵語讀音都幾相似噶：大家嘅韻母（/ɐi/）同聲調（陰平聲，或第1聲）都一樣。佢哋嘅動語讀音中，唯一唔同嘅地方就係聲母喇，即係發音嘅開首。聲母響語音學（Phonetics）上，被稱為“輔音”或“子音”（consonant），發音嘅時候負責用某個發音部位，部分或者完全阻礙氣流。
“溪”嘅粵語拼音為/kɐi1/，/k/係聲母，亦即係呢個字響開頭嘅輔音。粵語嘅/k/聲母叫做“清軟顎塞音”（voiceless velar stop）或“清軟顎爆破音”（voiceless velar plosive）。“清音”（voiceless）即係話：發呢個音嘅時候，聲帶（vocal cords 或 vocal folds）係唔震嘅（摸摸喉核試下）。“軟顎”（velum 或 soft palate）係一塊肌肉組織，係口腔天花板比較入嘅部份，響“硬顎”（hard palate）後方、“懸雍垂”（又稱“小舌”、“吊鐘”、“喉嚨椗”，英文：uvula）嘅前面。“塞音”（stop），或“爆破音”（plosive），係輔音發音方法嘅一種，方法係：先閉塞氣流嘅通道，然後急促打開通道，將聲音發出。
顧名思義，“軟顎塞音”即係話：用條脷嘅較後部分，將軟顎頂到行，就緒後就急促放鬆條脷，所發出嘅音。呢個音用粵語拼音表達時會寫成/k/，不過用國際音標（international phonetic alphabet，縮寫：IPA）表達時，往往會寫成[kh]；右上角嘅小“h”代表呢個清軟顎塞音係送氣（aspiration）嘅，即係話呢個塞音發聲時會有强烈嘅噴氣。相對而言，淨係就咁用[k]呢個 IPA 符號大多表示唔送氣嘅清軟顎塞音，即係粵語同通話拼音嘅/g/音，就即係粵語“鷄”呢聲母；千祈唔好將呢個音同英語中同樣唔送氣嘅軟顎塞音[g]混淆，因為呢個[g]音係“濁音”（voice），即係話嗰孖聲帶會震。
正話講過，“溪”呢個字一音係塞音，發呢個音嘅時候，要用力咁將條脷比較後嘅位置頂行個軟顎，再將强烈嘅氣流噴出嚟。但如果條脷嘅動作唔够力嘅話，就好可能將“塞音”發成“擦音”（fricative），而呢個現象可以稱為“擦音化”（spirantization 或 affrication），係“輔音弱化”（lenition）嘅一款。
就等我詳細解釋下個“溪”字被擦音化嘅情況喇。當條脷唔用力咁頂住軟顎嘅時候，就會有漏洞響脷同軟顎之間，氣流就會經漏洞流出嚟，形成摩擦（friction）,稱為擦音根據呢個情況，當清軟顎塞音[kh]擦音化，就會變成“清軟顎擦音”（voiceless velum fricative）。
清軟顎擦音，其實就係粵語同普通話嘅聲母/h/，亦都即係正話所講嘅粗口“閪”字嘅聲母。呢個音用IPA表達嘅時候，就會被寫成[x]（小心：唔好將呢個音同普通話嘅/x/聲母，或者英文嘅/s/、/ks/輔音混淆）。呢個[x]音聽起嚟就同響英文出現嘅[h]音非常類近。[x]同[h]呢兩個輔音嘅略為不同之處在於氣流被阻礙嘅程度：
發[x]音時，脷同軟顎之間縱然唔完全閉塞，但都造成一定嘅障礙，故形成擦音。而發[h]音時，氣流係由肺部直接經過聲門，再流出口腔外，過程中氣流並冇受到任何發音器官嘅阻礙。由於氣流並冇受阻，所以專家唔將佢歸類為擦音，而係叫呢個[h]音做“清聲門過渡音”（voiceless glottal transition）；但因為氣流與喉壁之間有摩擦，所以習慣上[h]音都會被稱為“清喉擦音”（voiceless glottal fricative）。
平心而論，廣告中嘅少女發“溪”音時並冇乜嘢大問題，清軟顎塞音[kh]係能够成功發出嘅。只不過，佢發呢個音嘅時候，不妨用力些少，等氣流可以更清脆利落咁發出嚟，個塞音就會同個擦音分得更加清楚。
（未完）
